Gailu medikoak garatzea, sortzen direnetik merkaturatzen diren arte, prozesu garestia eta arriskutsua izan daiteke. Eta ezaugarri hori bereziki nabarmentzen da EBko egungo 2017/745 Erregelamenduak eragindako arrisku handiko gailu medikoen kasuan. Teknologia medikoko enpresek prozesu honetan arrakasta izateko aukerak handitzea da TBMED proiektuaren helburu nagusia. Hori lortzeko, TBMED berrikuntza irekiko proben banku bat ari da sortzen: go.Med. Hain zuzen ere, proba banku hori da Europako enpresa txiki eta ertainen (ETE) berrikuntza-gaitasuna hobetzeko berariaz diseinatutako lehenbizikoa.
Argitaratu berri den bideo batek TBMEDen ikuspegi berria eta go.Med bankuak sortzen dituen onurak aurkezten dizkie ikusleei. Onura horiek ETEei ez ezik teknologia medikoaren sektore biziki lehiakorrean interesa duten alderdiei ere zuzendurik daude. Bideo animatuak nabarmentzen duenez, go.Med azelerazio-plataforma baliotsua da, eta gailu medikoak garatzeko prozesu osoa biltzen du (garapen aurreklinikotik proba klinikoetaraino). Arrisku handiko gailu mediko bat garatzeko bidean egin beharreko urratsak erakusten ditu, xehetasunez sartzen da go.Med plataformaren zerbitzuen zorroan, eta indar ematen dio TBMEDen berrikuntza irekiko proben bankuak erabiltzen diseinu bidezko kalitatearen kontzeptu berritzaileari.
«Azken urte hauek nahiko zailak izan diren arren, aurrerapen handiak egiten ari gara proba-banku oso erabilgarri bat eraikitzeko bidean. Orain arte, partzuergoan parte hartzen duten gure bazkideei eman dizkiegu zerbitzuak, baita bi deialdi irekiren ondoren sartu diren beste enpresa batzuei ere», adierazi du Iraida Loinaz TBMEDeko koordinatzaileak eta CIDETEC Nanomedicine-ko Zuzendariak.
«Adibidez, merkatu-analisi bat egin eta elkarrizketa goiztiarrak izan ditugu medikuekin eta arautzaileekin, kontzeptu-fasean beren produktuak definitzen laguntzeko. Garapen-fasean, eskalagarriak izango diren fabrikazio-prozesuak garatzen ari gara, eta enpresa horiei in vitro eta in vivo eredu aurreratuak ematen dizkiegu beren produktuak baliozkotzeko. Prozesu hori guztia gure diseinu bidezko kalitatearen metodologian oinarrituta egiten da. Baliozkotze-fasean, arauzko ibilbide-orriak marraztuko dituen gabezien azterketarekin hasiko gara. Hori dagoeneko egin da bi gailutarako, eta Laborategiko Jardunbide Egokien lehen azterketak planifikatzen ari gara gailu horietako baterako. Azkenik, berriki espediente bat aurkeztu diogu Sendagaien eta Osasun Produktuen Espainiako Agentziari, proben bankuan gure lehen saiakuntza klinikoa hasteko; era berean, bigarrenari ekiteko lanean ari gara, zeina hainbat herrialdetan egingo baita aldi berean. Oro har, oso pozik gaude orain arte egin ditugun aurrerapenekin, eta interes handiz espero ditugu proiektuaren hurrengo hilabeteak», amaitu du Iraida Loinazek.